Siri 私隱風暴｜Apple 9500 萬美元Settlement 港人有份申請？

Apple 因 Siri 無意啟動竊聽用家對話，陷入集體訴訟《Lopez v. Apple》，近日終以 9500 萬美元 達成和解 Settlement。事件源於 2014 至 2024 年間，部分用家發現 Siri 未獲授權下自動啟動，並將私人對話錄音上傳，甚至傳畀第三方廣告商，惹來私隱爭議。

訴訟重點 一句「Hey Siri」都可惹禍

案件指控 Apple 在用戶未經同意下，因 Siri 無意中被啟動，錄下用戶與人之間嘅私人或機密對話，並將錄音內容提供予廣告商作個人化推廣用途。

原訴人表示，佢哋喺無啟動 Siri 嘅情況下講咗某啲品牌名，幾分鐘後就即刻收到相關廣告彈出，令人懷疑裝置有監聽。

Apple 承認 Siri 錯誤？

Apple 雖然否認所有指控，並強調從未將錄音內容出售俾廣告商，不過最終仍然選擇庭外和解，避免訴訟升級及損害品牌聲譽。

乜人有資格攞賠償？

只要你喺 2014 年 9 月 17 日 至 2024 年 12 月 31 日 期間曾經：

擁有或購買過支援 Siri 功能嘅 Apple 裝置（包括 iPhone、iPad、Apple Watch、MacBook、iMac、Apple TV、HomePod、iPod Touch）並且曾發生過 Siri 無意被啟動、錄下私人對話。你就可以遞交申請，每部裝置最高可獲 20 美元賠償，上限為 5 部，即最多可攞 100 美元（約港幣 780 元）。

注意：申請人必須為美國本土或其領土居民

點樣申請Apple Siri Settlement？

受影響用戶可以經網站登記索償，截止日期係 2025 年 7 月 2 日。

👉 登記網站：https://lopezvoiceassistantsettlement.com/

你可能會收到一封電郵或明信片，內含 Claim ID 及確認碼，用嚟核實身分。如果冇收到都唔緊要，可以用其他資料登記。

裁決幾時有結果？

法院預計會喺 2025 年 8 月 1 日 開庭批准和解協議。一旦通過，合資格申請人會陸續收到所屬份額。